文/邵永平

　　【新民晚報推薦】相聲，作為民間説唱曲藝個一種形式，迭張“全國糧票”老早就成為各類綜藝節目勿可缺少個調味品，伊依靠“説學逗唱”個手段達到讓人開懷大笑，為大家所喜歡。近年來，以海派清口脫穎而出個周立波講個“大蒜咖啡論”，也引起交關人個關注搭議論。近搶把，北方一批新型個年輕相聲團隊搭仔個人開始陸續“南漂”開進上海灘。有人就突發異想：是勿是“大蒜”想來動遷阿拉“咖啡”地段？

　　相聲垃拉“文革”結束後，出現了歷史浪向第二次高峰期。以侯寶林、馬三立等泰斗個大師為代表，朝後出現了以馬季、侯耀文、高英培、蘇文茂、郝愛民、李文華、姜昆、牛群、馮鞏、笑林等中青年代表承上啟下；紅遍全國。儘管如此，上海人依舊鍾情本土特色“説學做唱”個獨腳戲；而相聲名家到上海亮相，賽過“外星來客”，一晃就跑。主要原因還是因為方言習慣搭仔文化背景個差異。記得每趟碰到南北曲藝名家匯集申城同臺交流，連侯寶林先生也會拱手讓姚慕雙、周柏春或者楊華生、袁一靈壓臺。北方個田耘社、樂透社、白領社、相聲大會、品歡相聲會館咾啥相聲團體紛紛下上海。由於水土不服，搿班人馬嘗足了文化苦旅個味道，但還是出現了勿少相聲、相聲劇新作，受到了一眼上海人個歡喜，引起一定反響。現在新個一代相聲演員來上海開説相聲，理由有三點。首先，“新上海人群”是聽相聲個主要對象。每年有交關新上海人到申城做生活，緊張個工作之餘，聽相聲放鬆神經。其次，北京、天津個國有、私有相聲團體飽和，混只熟面孔也要等半半六十日，還勿如走為上計。迭批隊伍年紀較輕，文化程度蠻高，大多數人具有原創能力。其三，上海歷來是個五方雜處個包容度大個城市。老底子上海人就有接納各種思維個習慣，再講藝人歷來就有“四海為家”習慣，想當年梅蘭芳先生靠傳統京劇一炮走紅上海灘，也不失為新生代藝術家個榜樣。相信北方相聲南下上海灘，也就是“大蒜”想來動遷阿拉“咖啡”地段，是有其道理個。

　　葛末是勿是來三呢？為了管理好迭支“野戰部隊”，市曲藝家協會還特特為成立了相聲專業委員會，為北方兄弟提供諮詢、搭建、交流、服務、管理等平臺，為相聲進入上海做了一件實事。相聲達人郭德綱搭仔于謙今後每年會到上海開場子，再迭能下去，伊也會成為半個上海人了。如果北方相聲以其優秀個表演段子為上海人所喜歡，迭個也是一樁老好個事體，不過，交關上海人還是歡喜看上海本地個戲，伸長頭頸骨等拉海看到老老扎勁個“獨腳戲”、“滑稽戲”咾啥，“大蒜”想來動遷阿拉“咖啡”地段，還是蠻難個。