文、畫

　　程多多

　　【新民晚報推薦】想想現在真是道地，每當天氣出現雷電或者狂風暴雨個辰光，手機信息會及時通知大家早點作好準備。而每趟有大風雨來個辰光，我常常會回想到我小辰光所經歷過個下大水個場面。

　　上海地區垃拉夏天介辰光，經常性會落陣頭雨。剛剛還是蠻好個天，突然之間會得天墨赤烏黑，感覺就像夜裏，頓時飛沙走石，狂風暴雨。上世紀五六十年代以至到七十年代，垃拉延慶路華亭路以及長樂路富民路等一帶，由於地勢老老低，加上地下排水管年久失修，碰著一有傾盆大雨，就會形成令人尷尬個局面，也就是阿拉上海人講個“漲潮水”。有辰光雨落得邪氣結棍，一歇歇功夫，整條馬路像水滿金山，一片汪洋哉。上面落雨，陰溝洞裏齷齪水還會冒出來。當時我還是小學生，勿曉得下大水個辛苦，恨勿得叫整條被黑碴碴個水淹沒個馬路，當做大河，裏向開開大兵艦。乃末看到開過來個大卡車興奮煞脫了，輪胎邊翻起來個白花花個波浪，真是波瀾壯闊。活脫勢像一艘軍艦垃拉乘風破浪。邊浪向個黃魚車賽過魚雷快艇，雖然卷勿起多少浪頭，但還是可以看得到水花沾到來勿及逃開個行人身浪向，各種狼狽樣。尤其是看到腳踏車搭卡車窄路相逢，有個辰光碰到搿個踏腳踏車個人，搿個老鬼【ju】三騎車技術勿靈，本來就抖抖歪歪，看見大卡車直衝自家過來，心急慌忙弄得勿巧，連車帶人一道跌下去。浸濕一身衣裳倒是小事體，弄出交通事故來，搿就勿得了了。從七十年代初，我就住拉一樓原來個鍋爐間裏，一旦碰到發大水個日腳，我就如臨大敵，拿浸勿起個物事豪燥朝高處擺。一定要搶垃拉水還嘸沒氽進來前頭就弄好。等到大水退脫，房間裏就像打過仗一樣，亂七八糟。看看對過沿馬路個人家還要作孽。老古閒話講：兵來將擋，水來土掩。勿過啥地方來介許多爛污泥?只好有啥用啥，情急之下舊門板、跳板、板凳、木箱咾啥統統撥伊用上去了。有常時聽到遠近一片驚呼，只看見拖把、掃帚、畚箕、面盆、甚至燒開水個銅吊儕拿來拷。聽聽前面老遠傳來大呼小叫，再看看氽垃拉水面浪個木板、木箱咾啥跟了大水漂過來，就曉得前頭個潮水一定蠻大個。

　　現在上海已經看大勿見漲大水了。