琴日講完畢業生嘅複雜心情，今日講講高考生嘅忐忑心境。真係好想代啲靚仔大聲疾呼一句“放過我哋啦！”高考嘅緊張心情有時唔係自發，而係週遭帶俾佢哋嘅。

　　比如，離考試仲有一段時間，啲家長已經進入全家嚴管戒備狀態：老竇有歐洲盃都唔敢睇，驚住嘈親個仔；落班準時返屋企，保持安靜大氣都唔敢抖；一早熟習趕考線路，仲準備埋“應急地圖”。“超級媽媽”就變身“營養美味飲食天王”，每日自製私家湯、外賣營養品，煮愛心早餐、益智宵夜。一句講曬：“備考試題塞滿個腦，營養食品塞滿個肚”，搞到啲血液都唔知應該谷上腦定係供給個肚。

　　老師化身“嫦娥”，日哦夜哦，講來講去都係一堂“恐嚇課”。務求令考生知道“只要考得衰，呢世都無得追”；極力灌輸“考到清華就富貴榮華，考個三本就揸兜洗碗”。所以就出現“吊針復習、打針提神、冷氣開到盡、風扇吹到暈”嘅奇景，我諗如果吸毒唔犯法，為咗考高分嘅佢哋分分鐘以身犯險。

　　有句呃人嘅廢話叫做“壓力即係動力”，呢句嘢認真害死人！我壓幾百斤石頭落你度，你動俾我睇睇？減輕壓力先有最大動力。考生身邊嘅人，總係打住“我為你好”嘅旗號，不斷做好多嘢出嚟增加考生嘅心理壓力。心理承受力差啲嘅，未考試就已經去做“空中飛人”。令考生以為“考試唔係對自己負責，係對自己身邊嘅人負責；考得差嘅，唔係對唔住自己，而係對唔住嗰班對自己有期待嘅人”。班細路都未出社會，就認為“人生”嘅意思係“為人哋而生”。

　　彭彭喺度懇請各位過度緊張、慌張、誇張嘅“三張家長、三張老師”，你哋放過班考生啦！一個心態開朗、身體健康嘅仔女，比起一部“考試機器”仲值得你哋驕傲。俾返休息時間同放鬆空間啲細路，朝早睇睇《新快報》，夜晚睇下《最新聞》，心情好、身體好，話唔定考得更高分數呢！

　　●網友你點睇

　　@懶蟲蟲喇：有時候都不知道自己這麼拼命是為了什麼，考到了又如何，考不到又如何，生活依然要過，自己開心努力過就得啦。

　　@X---標逢葉-緣：個個同學高考前都返到高一時光，有玩有笑，成績同樣好！何必以呢種形式嚟“抱佛腳”。

　　你有嘢想講？

　　請上新浪微博@新快報陽光社區