獵豹BB，如假包換的廣州女生，曾在奢侈品職場打滾，更流連于柴米油鹽的生活，會賺錢理財，更愛花錢購物。

　　慳家Lady

　　人貴有自知之明，技術唔夠人揮，就一定要識揾幫手！我揀嘅幫手？勁呀！就係高科技啰！

　　當年一句家喻戶曉廣告詞：“呢個係萬寶路嘅世界！”將萬寶路準確咁定位為男人煙。喺我嘅理解當中，同萬寶路一樣，大廚向來都係男人嘅世界，無論中廚西廚，大廚都係男士居多；而一講到女人掌廚，好自然就被降呢（Level），稱之為廚娘。如果將大廚比喻為善於長刀短劍嘅武將，咁廚娘往往就被擬作只懂剪紙繡花嘅閨中，難登大場面。但係現時大多數屋企反而都係廚娘嘅天下，仲係有好多好似我咁仲兼顧忙於上班加班嘅職業女性。當然初初受電視劇荼毒太深，認定煮得飯多肯定變黃臉婆，俾自己有藉口疏于落廚，終日流連于外賣加茶餐廳；但日子耐咗，唔止自己都吃到毋癮，最弊係連屋企阿老細都詐型嘛！痛定思痛，決定向後廚進發！

　　睇個標題當然估到我嘅廚藝水平應屬於懶羊羊級別嘅菜鳥，但我嘅目標當然希望表現得如美羊羊，有姿勢有實際。相對精通廚藝，一雙巧手可使喚出滿漢全席嘅殿堂級師奶媽咪，我呢D一定係廚藝小兒科。不過，人貴有自知之明，技術唔夠人揮，就一定要識揾幫手！我揀嘅幫手？勁呀！就係高科技啰！例如帶預約功能嘅廚房小電器一定係懶廚娘最抵錫嘅心肝寶貝：電飯鍋預約有飯吃，小熊蒸蛋器五分鐘有水蛋吃，天際燉盅預約有湯飲，落班返黎炒埋個青菜，10分鐘兩餸一湯，白飯任裝，況且小電器大多操作簡便，就算點水皮，住家飯都好吃過外賣。當然，另外一個原因比改善自己伙食更重要：阿媽話齋，想留住男人嘅心，最緊要識留住佢嘅胃，肯落廚係個好開始。而五花八門嘅輔佐工具簡直係進階級懶廚娘嘅靈丹妙藥：唔識刀斬，可以買把Vivtorinox雞骨剪，唔識磨豆漿，可以買部九陽豆漿機；總之科技日新月異，哽有一個産品可以取代傳統。最後唔好忽略，強大嘅網絡絕對係懶廚娘有求必應嘅神符，有乜唔識，上網一定有答案！分分鐘講得啰嗦過阿媽，按住步驟做，大廚水準唔包，合格分數一定有。

　　最近升呢做咗個四人家宴，朋友對我嘅廚藝刮目相看，讚我有質嘅飛躍！哇！咁讚法簡直好似話你豬扒變港姐咁威水！冷盤係碧簪鑲潤玉（其實係青瓜鹹酸配熱薯仔泥），湯係鳳尾繞花開（咪係花生眉豆褒雞腳啰），主菜係遊龍嬉芙蓉（蛋白蝦球），鴛鴦映明月（滷水鵪鶉蛋鵝掌亦），翡翠禦如意（木耳炒西芹），飯後甜品係琥珀長相思（哈哈，應該估到係核桃露拼紅豆沙）。無須設計技術含量高嘅菜品，多年奢侈品從業經驗話你知，成功之處在於包裝！米其林大廚掌廚嘅名流晚宴人人趨之若鶩，唔係D嘢有幾好吃，反而係場面華麗，菜品裝飾陳列別出心裁。

　　邏輯控嘅朋友肯定想問我點解係四人家宴？好吧，我承認懶廚娘屋企嘅鍋碗瓢盆只夠四人分餐上菜；另外，我確實有D後悔有自在唔享攞苦來呻，因分餐用咗太多碗碟，導致我洗咗成個鐘碗。不過，賢妻良母確實係劑良藥，佢代表嘅唔係單純一個誇獎，最緊係寓意你娶得過！我估呢個point無乜女人唔受啰。