獵豹BB，如假包換的廣州女生，曾在奢侈品職場打滾，更流連于柴米油鹽的生活，會賺錢理財，更愛花錢購物。

　　慳家Lady

　　其實只要你嘅好奇心唔好只係停留響個價錢牌上，多去了解産品背後嘅故事，將奢侈品回歸到必需品嘅消費概念，自然就會多幾分底氣，自己知道點去為自己選擇。

　　唔少朋友叫我俾意見，點去選購奢侈品？我會問返你先：購物預算內，你會揀雞頭定鳳尾？

　　一個品牌可以屹立百年不倒，個個都唔係二打六，肯定都有番幾分斤兩。我認為所謂品牌排行對普及品牌知識或者有D用，但更多反而會誤導消費者迷信榜單，變成凈係識揀最貴，唔去揀適合自己。縱觀各名牌嘅起源，LV創始人本來係皇后嘅捆工，專幫皇室打包行李，品牌初衷係設計出更堅硬耐摔嘅旅行箱，適應長途旅行嘅顛簸；而愛馬仕則以製造馬具起家，我哋貢如上品嘅Birkin最初只係為咗方便旅行登機而設計嘅實用公事包。但現實中有幾多人會深入研究品牌工藝，了解産品如何製成，再衡量售價同自己嘅需求才去購買？誇大其實際價值，使之變成炫耀資本嘅大有人在。有人死慳死抵，挨幾個月麵包甚至嗮半年工資就係為咗買個LV。

　　公車上有時會見到打扮精緻嘅女孩，右肩優雅背著個小巧精緻嘅2.55，但左手摞住個便當，右手摞住個電腦袋，反而搞到無手扶住扶手差點撲親；究竟其時嘅2.55對於佢來説係美麗嘅點綴定係多餘嘅負累呢？不經意間自己或已成為名牌奴隸而渾然不知？

　　其實奢侈品消費本身並無褒貶之分；相反，更多人願意為奢侈品埋單，某程度説明我哋嘅個人品位同生活品質不斷提升。回想下二十年前，手錶、衣車、單車呢“三大件”就係當時嘅奢侈品，嗰時騎住部英國來佬“三槍”單車穿街過巷嘅威水程度絕不亞於依家揸部林寶堅尼；後來漸漸升級到電視機、冰箱同電話，呢D以前印象中嘅“奢侈品”，今日已係大家都可以擁有嘅必需品。時移勢遷，究竟我們對待奢侈品嘅態度仲要停留喺炫耀嘅門面功夫上，定係可以更深層次淬煉得將奢侈品作為享受高品質生活嘅一種方式呢？

　　卓越品質，精湛工藝以及追溯其歷史積澱，文化傳承往往係頂級奢侈品成功嘅賣點，昂貴嘅價格反而係最後嘅因素。奢侈品唔一定就係最貴，而貴亦唔一定等同奢侈品。其實只要你嘅好奇心唔好只係停留響個價錢牌上，多去了解産品背後嘅故事，將奢侈品回歸到必需品嘅消費概念，自然就會多幾分底氣，自己知道點去為自己選擇。購物預算內，你會揀雞頭定鳳尾？我就會選擇前者，小雞雖無鳳凰地位尊貴，但雞頭高高昂起，係雞嘅靈魂所在；鳳尾嘅羽毛雖絢麗多彩反卻容易凋零。一個Never full嘅價格我更情願去買一個手工縫製，皮質優良嘅意大利獨立品牌。

　　當我哋仲忙於攀比擁有嘅奢侈品沒有最貴只有更貴嘅時候，唔好忘記其實時間先至係世界上最昂貴嘅奢侈品。每個人嘅幸福感其實係取決於8小時工作8小時睡覺之外嘅另外8個小時係點過。賺幾多食幾多著幾多並唔重要，重要嘅係有人同你分享。與其花一萬幾買個名牌小心翼翼咁服侍佢，不如用呢個預算與家人朋友相聚同歡。幾時都係獨樂樂不如眾樂樂嘛！