文/沈錫倫　上海師範大學中文系語言學教授

　　王小姐是新上海人，五年前從山東來到上海求學，畢業後尋著了一份穩定個工作。伊為了更加好個融入上海社會，一直積極個學講上海閒話，勁頭邪氣大。不過吶，伊講個上海閒話常常分勿清爽有種介字應該哪能講，我聽伊講上海閒話覺著蠻滑稽個。喏，我講只笑話撥儂聽聽，昨日仔搭，王小姐搭我講，禮拜日【niK】伊到“大【dhu】光明電影院”去看了一場電影，伊拿“大光明”個“大”【da】講成了“杜”音，我聽見仔笑得來肚皮痛。搿種滑稽來死個事體伊也勿是第一趟了，上趟伊還拿“大【dhu】塊頭”【大胖子】講成了“汏【dha】塊頭”。我就搭伊講，“大”迭個字垃拉上海閒話裏向有兩個讀音：一個讀“汏”，就是“買汏燒”個“汏”，“大光明電影院”個“大”要讀“汏”；還有一個讀“杜【dhu】”，像“大小”“大娘舅”【大舅舅】個“大”就要讀“杜”音，勿要弄錯脫。

　　一個字（勿是多音字）讀兩種音，迭個叫文白異讀，裏向一個音叫文讀音，還有一個音叫白讀音。像“大光明”個“大”，讀“汏”是文讀，讀“杜”是白讀。迭個兩種音裏向，白讀音代表了比較古老個音，文讀音代表了近現代個音。

　　實際浪向，文白異讀垃拉上海閒話裏向還是蠻多個，像王小姐搿能學講上海閒話個新上海人作興（可能）勿大曉得。現在我再舉幾個例子：

　　“人”，文讀音【zen】(人民廣場、人造衛星)，白讀音【nin】(中國人、好人);

　　“仁”，文讀音【zen】(仁義道德、仁至義盡)，白讀音【nin】(杏仁、蝦仁);

　　“味”，文讀音【vi】(味覺器官、味精)，白讀音【mi】(味道、氣味);

　　“兒”，文讀音【er】(兒女情長、小兒科)，白讀音【ni】(兒子);

　　“耳”，文讀音【er】(耳目一新、耳機)，白讀音【ni】(耳朵)(青浦話“木耳”叫“雲耳”，音【yunni】，“耳”讀【ni)】;

　　“二”，文讀音【er】(二氧化碳、二流子)，白讀音【ni】(第一第二、二兩飯);

　　“嘉”，文讀音【jia】(嘉獎令、嘉賓)，白讀音【ga】(肇嘉路、嘉興粽子);

　　“家”，文讀音【jia】(家庭、家畜)，白讀音【ga】(一家人家、做人家【節儉】);

　　“馬”，文讀音【ma】(馬馬虎虎、巴拿馬運河)，白讀音【mo】(馬戲團、馬蘭頭)

　　“巴”，文讀音【ba】(作家巴金、巴黎公社)，白讀音【bo】(巴勿得【巴不得、迫切期盼】、嘴巴、尾巴);

　　“物”，文讀音【fheK】(失物招領、物理學)，白讀音【meK】(啥物事【什麼東西】);

　　“生”，文讀音【sen】(幸福生活、生物學)，白讀音【sang】(做生活【幹活】、吃生活【挨揍】);

　　“戴”，文讀音【de】(不共戴天、愛戴)，白讀音da(戴帽子、戴眼鏡);

　　“學”，文讀音【yhiaK】(戲劇學院、科學研究)，白讀音【hhoK】(大學生、學外語);

　　文白異讀是由歷史原因造成的，老上海人一般儕分得蠻清爽個，不過有種介字文讀白讀儕可以個，像家樂福超市，有人講是“【jia】樂福超市”，有人講是“【ga】樂福超市”，“人事科”，有人講是“【zen】事科”，有人講是“【nin】事科”。迭個倒嘸沒定規。新上海人學講上海閒話，一定要分清爽文白異讀，否則個閒話，我要牽儂頭皮個【善意地取笑】啊。