文/李元

　　小辰光我特別歡喜過年，原因老簡單，大人嘮啥儕擁到阿拉屋裏向跟我爺爺奶奶拜年，乃末還圍牢我轉，撥我壓歲鈿。還可以聽到交關邪氣適意個閒話，比如講，迭個小囡兩眼炯炯有神，成績一定勿錯，迭個小囡文文靜靜以後長大一定是個大家閨秀……勿管真個假個，迭些客套話讓年小個我聽得老寫意，看看窗外星光璀璨屋裏熱氣騰騰，我一記頭覺得眼門前出現一條平坦個康莊大道垃拉等著我去踐踏，將來個日腳一定會過得比現在更富足搭美滿。

　　每到晚飯吃到一半個辰光，幾個大人儕會得從袋袋裏或者大衣內側抽出紅包塞撥我，迭個辰光阿拉姆媽就會衝過來做出一副死活勿肯收個樣子，乃末送紅包個人也隨著伊個搖擺開始搖擺，勿過搿點個紅包是早晏【e，晚】會落到我手裏。我有禮貌個接過壓歲鈿，一個轉身進我自家房間，撕開紅包點鈔票。一般而言搿些閒話勿多西裝筆挺個人撥鈔票頂多，伊拉淡淡個拿紅包遞撥儂，頂多講一句新年快樂，就淡淡個又走了。而還有些喝得面紅耳赤講話大聲，邊撥儂紅包邊吐著唾沫星子叫儂拿了壓歲鈿之後一定要好好讀書個，撥個一定老少。

　　搿辰光我勿曉得為啥電視裏個小囡收了紅包就跟考了一百分一樣活蹦亂跳，搿眼編劇肯定勿了解小囡，想想有啥好開心個，我拿了紅包儕交拔我姆媽，阿拉娘真正是最終受益人，我頂多算個仲介。記得有一趟一個帶戴金絲框眼鏡個爺叔塞撥我一隻蠻厚個紅包，一轉身我就交撥了我姆媽。但伊有一個邪氣宏偉個理由，搿眼紅包正好用來搭我付學費。

　　當我念起搿段勿計紅包個青蔥歲月，心裏總歸有眼感慨。有種感覺失去了就尋勿回來個味道，當我開始真正關心紅包厚度個辰光，幾個親戚家個小囡也上起了班過上大人個日腳，我也該為以後個塞撥其他小囡個紅包做起準備。一年到頭，頂開心個還是埃些天真無知個，學著大人點鈔票個模樣數紅包個日腳，那交作業個姿勢交紅包，用你追我趕個笑聲告訴身邊個大人，阿拉有紅包啦。