作者: 黃國英(內容由Quamnet提供)

　　去年本欄寫過，接替東尼的艾薩（Isaac Sofaer），與自己有一面之緣。近日他舉辦投資課程，同事去了旁聽。艾薩選股，從下而上，主張擇優而買，不必過分被宏觀因素牽引。有一男士，股齡應已不淺，隨即問曰：「不理外圍，恕難茍同。歐洲、美國如此，勢似續跌，豈非應抱牢現金，靜候良機？股價再瀉，估值更低，豈非更加抵買？」

　　完美捕捉非易事

　　艾薩回答，不失睿智：「再跌機會，不可排除。閣下現金為王，不便阻擋。敢問一句：幾時係底/抵？邊刻入番市？很多人離場後，一路等等等，到真係見底，仍然不敢出手；之後升番，又嫌唔夠抵，最後都無入番，錯失後續升浪。」艾薩最有point的，是指出：當日見頂，多數人未能抓著；來日見底，為何又有信心捉正？完美捕捉時機，多是虛幻，不若分段買入。

　　前輩教誨，所言甚是。自己一向認為，所謂「現金為王」，短線有理，長期有害。股市續瀉，連破數關，後美元走強，貴金屬各有死傷，連人仔都瓜埋。此時此刻，難免想全倉盡斬，轉揸港紙，歸家瞓覺。然後每日睇睇大市，跌五百？「?！話咗啦！又慳番兩、三巴仙嘞！」升五百？「唓！跌咗咁多，升番少少！咪話我話，轉頭咪又跌過！」如是者，可以hea足一年半載，甚至更久，身家並無寸進，購買力按年遞減，但因數字上無輸，尚可若無其事。

　　現金非王，卻也不是打鑼打鼓，叫大家現價狂買。市況轉差、方向未明，提升現金水平，保存戰鬥力，算是操作守則。但不等於一有風吹草動，就全線清倉套現。不妨換個角度思考：揸現金，就等於沽空緊閣下想買的股票、想進入的資産類別。很簡單，當你有十盎司黃金，千六蚊盡沽，揸住美金。跌到千四，就可以買十一盎，仲有錢剩；升到千九，想買番十盎，唔該補多三千蚊盎。效果與沽空無異，只是在帳戶中顯示不到，難以感受，而且沽空一定要平倉，揸現金唔買嘢，最多輸通脹，無人會強迫重投市場。

　　清楚寫低入市條件

　　如果認為瞓身沽空，尤其是心儀的資産，是甚為戇居之舉，滿倉現金，亦不遑多讓。一時減低持倉，增加現金，不是問題，但一如沽空，要有「止蝕機制」：幾時「投降」，買回想揸的資産？最好白紙黑字，清楚寫低條件，例如：「中電（0002）、電能（0006），跌到四厘就買」、「黃金，千六蚊樓下，每五十蚊一注」。注意所設目標，不應虛無飄緲：「外圍無事就買」世界咁大，總有某地有壞消息，執意追求絕對安全，即是永不入市。

　　跌市期間，堅守部分資産，還要逐步買回，捱價在所難免。但將時框拉長，大部分資産類別，包括金股債樓，回報都比現金為佳。追捧港紙，代價不輕。要克服心理障礙，大可將身家用不同的單位計價，例如澳元，自能量化問題何在。

　　(本人客戶持有中電、電能的相關衍生工具)